Nandur Wiji

DADI wong kaya Mas Behi rasane kok ya le kepenak timen ya," ujare Kabul.
"Kepenak apane ta Bul, lha wong padha-padha mangane sega, nek arep nduwe barang apik ya padha le kredit," jawabe Mas Behi.
"Ora perkara kuwi, ning bab kewajibane Mas Behi minangka kepala rumah tangga. Senajan wis pensiun, ning putra-putrane rak wis mentas. Malah dha dadi uwong kabeh, ana sing dadi pengusaha sukses, dadi pejabat, malah ana sing neng luar negri barang."
"Ya Alhamdulillah, kabeh anak-anakku bisa nggayuh apa sing dadi cita-citane. Ning kabeh mau rak ora kaleksanan kanthi ujug-ujug. Kaya dene pak tani, nek kepingin panen kudu nandur wiji ndhisik lan dipupuk. Jaman semana aku ya nganggo prihatin barang, ibarate sirah dinggo sikil, sikil dinggo sirah mung supaya anak-anakku bisa nerusake sekolahe."
"Woo... mengkono ta Mas Behi, tak kira merga putra-putrane sing pinter-pinter."
"Pinter utekke pancen penting, ning ragat ora kalah pentinge. Mung wae nek utek kuwi wis gawan saka sing Kuwasa, dene ragat yen ora ana isih isa diupayakke. Lha nek anakmu kepriye, kepingin arep neruske sekolah sing dhuwur ora?"
"Lha iya kuwi Mas Behi. Nek sing gedhe, dhasare bocah wedok ya wis ben lulus SMA langsung kawin. Ning sing cilik iki lho, bocah lanang eman-eman nek mung lulus SMA."
"Sing wis kebacut kawin rasah digetuni, saiki nek isa sing isih sekolah disengkuyung kepiye carane supaya bisa nggayuh citane-citane. Wis tau ditakoni durung bocahe kepingin dadi apa?"
"Jarene kepingin dadi polisi, ning aku dadi semelang je Mas Behi."
"Ngapa kok semelang, dadi polisi rak gagah lan gaweyan sing luhur."
"Wah risikone kuwi lho, polisi jaman saiki akeh sing waneni. Malah wingi ana sing ditembak barang. Kudune rak polisi sing nembak, eee ... lha iki kok kewalik."
"Pikiranmu ki ora sah nglambrang tekan semono. Nek kabeh wong kaya kowe, mengko ora ana wong sing kepingin dadi polisi. Isa-isa uga ora ana sing kepingin dadi pejabat, mengko wedi ndak dicekel KPK mergo ditudhuh korupsi."            
"Weh... ya tangeh lamun nek ora ana wong sing kepingin dadi pejabat. Lha wong upamane korupsi sing gedhene isa dinggo pitung turunan, ukumane mung setaun rong taun. Apa ora kepenuk kuwi."   (*)